Inmigración

Zer egin emakumeen kontrako tratu txarrak daudenean

Inork ez du eskubiderik zuri mehatxurik edo min egiteko edo zu iraintzeko. Hurreko senide batek berak ere ez du eskubiderik sexu harremanak izatera behartzeko, jendaurrean iraintzeko, diruaz jabetzeko aukera kontrolatzeko, ezta zure lagunekin edo senideekin harremanetan izatea galarazteko ere.

Beste herrialde batekoa bazara ere, horrelakoren bat bururatzen bazaizu, tratu txarrak jasaten ari zara eta laguntza eska dezakezu:

  • Erasoa jasan baduzu edo jasateko arriskuan zaudela uste baduzu, poliziari edo epaitegiari eska diezaiokezu laguntza, babestu zaitzaten.
  • Tratu txarrik jasan baduzu edo beldur bazara, poliziari laguntza eska diezaiokezu, zuzenean edo zure konfiantzako norbaiten bitartez.
  • Lesiorik izan baduzu, zoaz osasun etxera. Bertan hartuko zaituzte, lesioak zelan egin dituzun azaldu eta oso baliagarria izango zaizun medikuaren txostenaren kopia eska dezakezu.
  • Nahiz eta lesiorik izan ez, laguntza eske etor zaitezke udalaren Gizarte Zerbitzuetara. Zure eskubideei buruko informazioa eman eta zure egoeratik irteten lagunduko dizute. Honako hauek eskainiko dizkizute: laguntza psikologikoa, aholkularitza juridikoa, diru-laguntza eta aldi baterako ostatua.

Eusko Jaurlaritzako Herrizaingo Saileko Genero- indarkeriaren Biktimei laguntzeko Zuzendaritzak 24 orduko telefono (900840111) zerbitzua ipini du martxan, doanekoa eta konfidentziala, tratu txarrak jasaten dituzten emakumeei eta egoera horri antzematen dioten pertsonei zuzenduta. Deiari honako hizkuntzetan erantzuten diote:euskara, gaztelania, ingelesa, frantzesa, errumaniera, txinera eta arabea.

Genero-indarkeriaren biktima gisa aitortutako emakume atzerritarrek, baimenik eduki ezean, aparteko zirkunstantziengatiko bizileku-baimena lor dezakete.